إين ؟ إكمــــال الدراسه أم الزواج ؟

[Emany]

السلام عليكم و الرحمه..

إكمال الدراسه أم الزواج ..!! أيهما فى مصلحة الفتاه..؟؟


الكثير من العوائل ترفض تزويج بناتها فى مرحلة الدراسه فالدراسه أولا ومن ثم الزواج ..هل وجهة نظرهم صحيحه ؟؟


أم ان الدراسه لاتمثل عائقا لزواج الفتاه حيث انها تستطيع التوفيق بينهما ؟؟


هل الشهاده الدراسيه اكثر ضمانا لمستقبل الفتاه من الزواج ؟؟

هل الزواج فى سن مبكره السبب لحالات الطلاق حيث يكون الزوجان غير مهيئين لتحمل المسؤليه وحل المشاكل ،كذلك أنشغال الفتاه فى الدراسه قد يلهيها عن واجباتها اتجاه زوجها وبيتها ،، فيحدث الأنفصل من أول مشكله أو خلاف..؟؟


فما هي وجهة نظركم ؟


:cheer: إيماني :cheer:

[عبداللهEngineer]

مشكورة Emany على الموضوع...

والدراسة أضمن حق مستقبل البنت، اما اذا كانت تقدر توفق بين الدراسة والزواج واهو شي

صعب، فعلى بركة الله...

والحل الوسط اللي انا اجوفه مناسب، أنه البنت تنخطب واتم مخطوبة لي ما تكمل دراستها،

وعقب اتزوج...

[Schneider]

شكرا على الموضوع الحلو ايماني :001:

من رايي ان هالايام الدراسه مهمه لان اعباء الحياة زادت ولازم الاثنين يتساعدون ويشتغلون ... يمكن ايام اول كان الزواج كفايه للمرأة بدون شهادات عليا لكن هالشي تغير الحين ...

وصح يمكن الزواج المبكر يؤدي الى الطلاق المبكر لان في هالسن بيكونون ماوصلوا لمرحلة النضج الكامل وتفهم الحياة بكامل امورها لكن تبقى المسألة في طريقتهم الخاصه لحل الامور والابتعاد عن المشاكل ...

:thnQ: مره ثانيه ايماني :bye:

[غزالة البحرين]

إكمال الدراسه أم الزواج ..!! أيهما فى مصلحة الفتاه..؟؟
في رايي إكمال الدراسة بس مو معناته الوحدة توصل لي الثلاثين و هي بدون زواج بحجة انها تبي تكمل دراستها و تاخذ ماجستير و دكتوراه :rolleyes: يعني لازم توازن بين الاثنين ما تخلي شي يطغى على شي
الكثير من العوائل ترفض تزويج بناتها فى مرحلة الدراسه فالدراسه أولا ومن ثم الزواج ..هل وجهة نظرهم صحيحه ؟؟
ذي وجهة نظر بيتنه ... على قولة امي ما عندنه بنات ينخطبون في هالعمر ;) و اظن أنه وجهة نظرهم صح.. لانهم يبون مصلحتي و في الاخير ما بتنفعني الا شهادتي
أم ان الدراسه لاتمثل عائقا لزواج الفتاه حيث انها تستطيع التوفيق بينهما ؟؟ يعتمد على حسب طبيعة البنت و ظروفها ناس يقدرون يوفقون و في ناس لا... بس أظن ان السالفة يبيلها شوية تنظيم وقت و ان شاء الله بتقدر بس المفروض انها اذا كانت تنوي تكمل دراستها و هي متزوجة تأجل مسألة الإنجاب لأن ما بتقدر تكمل دراستها اذا كان عندها زوج و عيال و التوفيق بين هذي الاشية الثلاثة وايد صعب :)
هل الشهاده الدراسيه اكثر ضمانا لمستقبل الفتاه من الزواج ؟؟ اي أكيد الشهادة اضمن و هي سلاح البنت في هالزمن... باجر اذا لا قدر الله الوحدة تطلقت من بيصرف عليها اذا ما كان عندها شهادة؟
هل الزواج فى سن مبكره السبب لحالات الطلاق حيث يكون الزوجان غير مهيئين لتحمل المسؤليه وحل المشاكل ،كذلك أنشغال الفتاه فى الدراسه قد يلهيها عن واجباتها اتجاه زوجها وبيتها ،، فيحدث الأنفصل من أول مشكله أو خلاف..؟؟

ايي الزواج المبكر ممكن يؤدي إلى طلاق مبكر لان الحياة الزوجية مسؤوليةو اذا كانوا الزوجين صغار في السن فما بيكونون مستعدين كليا انه هم يتحملون مسؤوليات و أعباء الحياة الزوجية و ينقصهم النضج و الوعي و الادراك الكامل غير انه البنت ممكن ما تقدر توفق بين الاثنين فتصير مشاكل بين الزوجين و ينفصلون عن بعض ...
يعطيج العافية على الموضوع Emany :thnQ:

[عابر القارات]

انا اقول ان الدراسه اهم
بس اذا كلش كلش تنخطب واذا تخرجت تتزوج
:thnQ:

[Emany]

عبداللهEngineer ..

العفو أخوي و حياك الله .. :)

حلوه وجهة نظرك و أنا أوافقك الراي .. و صحيح مثل ماقلت .. الزواج و الدراسه و اذا يابت لها نونو .. أحس مابتقدر توازن بينهم كلهم .. وايد صعب و خصوصا اذا كانت في سن اصغيره (18) وايد بيكون عليها عبء ..

شكراً على طرح وجهة نظرك .. :001:


شنايدر ..

لا شكر على واجب .. حاظرين .. :mf_wink:

ييت لنقطة مهمه و اهي .. مساعدة الزوج لزوجها بتكاليف الحياه .. و خصوصاً اذا الريال توه مبتدأ في سوق العمل و على قد الحال .. لازم اتساعده .. و طبعاً المساعده بتكون عن طريق اخذ شهادتها عشان تقدر تشتغل ..

وياك في نقطة الزواج المبكر يؤدي للطلاق .. مثل ماقلت توهم صغار ليلحين مانضجو عدل و ماعرفو الحياه ..

افا عليك .. كل يوم تعال .. و شاكره لك ردك .. ;)



غزالة البحرين ..

في رايي إكمال الدراسة بس مو معناته الوحدة توصل لي الثلاثين و هي بدون زواج بحجة انها تبي تكمل دراستها و تاخذ ماجستير و دكتوراه يعني لازم توازن بين الاثنين ما تخلي شي يطغى على شي


مثل ماقلت لج عجبني هاي الجواب .. :p و افكر اسوي هلون بس طبعا ماوصل للـ 30 :$ .. صح أنا ودي أكمل دراستي .. بس لو تزوجت بسن اصغيره .. و أنا وياه رحنا ندرس برع .. مافي مشكله .. بجذي وازنت بين الأثنين أو مثل مانقول ضربت عصفورين بحجر :y: والا أنتي شرايج ؟

** صحيح .. كل الأهالي تتمنى عيالها يرفعون راسهم بشهاداتهم .. ;)

*** أكيد وايد صعب .. بتفرغ روحها لمين ؟ الزوج ؟ البيت ؟ العيال ؟ .. وايد مأساه .. :shhh: والله يعين الي هلون ..

**** صح مب ضامنه ريلها .. شدراها اييها يوم و تصبح بورقة طلاقها >> قويه شوي :p .. عكس الشهاده بتم معاها ..

أخيراً .. وياج باللي قلتيه و خصوصا الزواج مسؤوليه كبيره .. و يبي لها مسألة وقت عشان تتعود ع الوضع ..

الله يعافيج غزاله .. :y:

عابر القارات ..
مشكور أخوي على رايك .. وياك باللي قلته :)


طبعاً كل واحد منكم ماقصر .. كلكم تتطرقتو لنقاط مختلفه .. بس ايجابيه .. و أنا معاكم باللي قلتوه .. :)

:cheer: إيماني :cheer:

[سفوووج]

انا اشوف الدراسة اهم ولكن ليس لطول العمر ممكن عند فترة معيينه خلال الدراسة

الزواج بحيث انه ما يمنع التقدم الدراسى :y:

[بنت عبدالعزيز]

إكمال الدراسه أم الزواج ..!! أيهما فى مصلحة الفتاه..؟؟
اكمال الدراسة طبعاً...

الكثير من العوائل ترفض تزويج بناتها فى مرحلة الدراسه فالدراسه أولا ومن ثم الزواج ..هل وجهة نظرهم صحيحه ؟؟
من رايي ينخطبون...
لكن إذا كانوا يبون يتزوجون عادي..
بس مب لو أول سنة جامعه وولا ثاني...

أم ان الدراسه لاتمثل عائقا لزواج الفتاه حيث انها تستطيع التوفيق بينهما ؟؟
عندي ان كلش ماتمثل عائق...

هل الشهاده الدراسيه اكثر ضمانا لمستقبل الفتاه من الزواج ؟؟
ايه 100%

هل الزواج فى سن مبكره السبب لحالات الطلاق حيث يكون الزوجان غير مهيئين لتحمل المسؤليه وحل المشاكل ،كذلك أنشغال الفتاه فى الدراسه قد يلهيها عن واجباتها اتجاه زوجها وبيتها ،، فيحدث الأنفصل من أول مشكله أو خلاف..؟؟
لااا بالعكس... لان مافي بنت تتزوج في سن صغير إلا انها تحب إلي راح تتزوجه...
على عكس إلي يتزوجون في سن كبير...

[Carlito Cool]

انا اقول كلكم كملوا دراسه لحد يطلع منها حق شغل ترى اهم شي الشهاده وانا طلعت من الثانويه وصرت مصارع وكله طق فيني واطق في الاوادم هذي مب عيشه :sad:

ثانك يو على الموضوع الكووول ايماني :y:


:afro: كارليتو :afro:

[za3noon]

السلام عليكم ورحمة الله وبركاته


إكمال الدراسه أم الزواج ..!! أيهما فى مصلحة الفتاه..؟؟


الكثير من العوائل ترفض تزويج بناتها فى مرحلة الدراسه فالدراسه أولا ومن ثم الزواج ..هل وجهة نظرهم صحيحه ؟؟

طبعا


أم ان الدراسه لاتمثل عائقا لزواج الفتاه حيث انها تستطيع التوفيق بينهما ؟؟

طبعا صعب التوفيق بينهم
بس لكل قاعدة شذوذ


هل الشهاده الدراسيه اكثر ضمانا لمستقبل الفتاه من الزواج ؟؟

نعم نعم نعم
أي أي أي
yes yes yes
أجا أجا أجا



هل الزواج فى سن مبكره السبب لحالات الطلاق حيث يكون الزوجان غير مهيئين لتحمل المسؤليه وحل المشاكل ،كذلك أنشغال الفتاه فى الدراسه قد يلهيها عن واجباتها اتجاه زوجها وبيتها ،، فيحدث الأنفصل من أول مشكله أو خلاف..؟؟

أكيد
طبعا الكل عارف أن الشخص ما يقدر يحدد طبيعة رفيج العمر الا وهو
فاااااااااااهم وعااااااقل
وراااااااكد
الشباب وهم صغار تلاقيهم يبون اللي شكله/ها حلو
بس لين كبروا يهتمون في الفكر والأخلاق
والتعليم والثقافة .................الخ

[Um-5alifa]

اهم شي الدراسة .. و الريل لاحقين عليه !! :p ههههههاي
و إذا كان الزوج طيب عادي أكمل دراستي و انا متزوجة ..
لكن قبل الزواج أحسن

[Emany]

أول شي السموحه ع التأخير في الرد عليكم :$

سفوووج .. صح .. و اهو الموازنه بين الأثنين :) .. شاكره لك مرورك أخوي ..


بنت عبدالعزيز .. امممممم وجهة نظج مختلفه عن الباجي والا أنا أجوف هالشي ؟ .. بس طبعاً كل هذا يكون على مقدرة البنت .. تقدر توافق بين الأثنين .. بدون نقص في أي واحد .. :)

مشكورة الغاليه ع الرد ..


Carlito Cool ... اهيهيهيهيه مالقيت الا المصارعه :p .. أكيد بهالزمن حتى الي عندهم شهاده جامعيه يوظفونهم بالواو .. >_> .. يو آر ولكم أخوي .. حياك الله و بالتوفيق .. :)


za3noon .. :y: .. مشكور أخوي على طرح وجهة نظرك .. و الأغلبيه تقول مثل الكلام .. :)


Um-5alifa .. هههههههههه اي والله .. شحادنا نعور راسنا بالريل .. :1aa: .. الله يعطيج الي تبين .. مشكورة حبوبه ..

:cheer: إيماني :cheer:

[مذهلــه]

طبعا الشهاده مهمه ..
بالنسبه لي افضل ان البنيه تنخطب واهيا تدرس .. واذا تبي تخلص دراسه بعد عقب الزواج ..
صج ان الحياه صارت معقده .. ومعاش الزوج يمكن مايزي والمفروض انهم يتساعدون في تحمل هالمسؤوليه ..
لكن رايي ان مكان البنيه بيت زوجها .. وتربي عيالها .. وماتقطهم على الخدم .. :p
واذا قدرت انها توفق بين الشغل والبيت وايد زين :y:

[night_rider]

ايماني :y: :thumbup: :thnQ: على هالسؤال الحلو ;)

والله يقولون اسأل مجرب ولا تسأل طبيب :p

يمكن مو الكل يعرفني في هالمنتدى بس آنه كنت متزوج وطلقت وباجر حفلة خطوبتي من شيخة البنات والحمدلله :)

اما عن زواجي الاولي فخطبت وآنه سنة اولى جامعة!!! وكنت ادرس في جامعة الملك فهد الي في السعودية!!! وطبعاً الي يعرف الجامعة يعرف انه وووووواااايد صعبة بس والحمدلله قدرت اكمل البكلوريوس واشتغلت وبعدين تزوجت!!! وهذي كله ما اثر على دراستي والحمدلله تخرجت بمجموع 3.5 :d بس يعني الله ماكتب و انفصلت :n:

والحين قبل ماتزوج بعد كنت افكر اني اواصل دراستي بس اجلتها (بمصاريفها :walen: ) حق الزواج :) وانشالله يقدرني اواصل :rolleyes:

الي ابي اقوله عقب كل ذي ان الدراسة مهمه بس الزواج بعد مهم!!! والواحد لازم يوفق بين الاثنين :y:

وهل الدراسة لها علاقة بالطلاق :nono: :) ماعتقد!!! وحتى لو كانت السبب يمكن يكون سبب غير مباشر!!! يعني الي يعرف شلون يوفق بين الاثنين مابتصيده مشاكل :)

الا اذا ياك الزوج الحلو (اقصد المتخلف)وقال حق مرته قعدي مافي دراسة وصار طلاق على هذي السبب فآنه بعد ماعتبر الدراسه السبب!!! السبب اهو راس القوطي :p الزوج :)

مشكورة اختي على الموضوع الحلو :y: والي لو باتكلم عنه مابخلص :mf_wink:

[angle]

إكمال الدراسه أم الزواج ..!! أيهما فى مصلحة الفتاه..؟؟

لثنين

الكثير من العوائل ترفض تزويج بناتها فى مرحلة الدراسه فالدراسه أولا ومن ثم الزواج ..هل وجهة نظرهم صحيحه ؟؟

ساعات



أم ان الدراسه لاتمثل عائقا لزواج الفتاه حيث انها تستطيع التوفيق بينهما ؟؟
يعتمد على اهية شلون لبنية وظروف زواجها وان شاء الله تقدر:ok:


هل الشهاده الدراسيه اكثر ضمانا لمستقبل الفتاه من الزواج ؟؟
شي اكيد:y:

هل الزواج فى سن مبكره السبب لحالات الطلاق حيث يكون الزوجان غير مهيئين لتحمل المسؤليه وحل المشاكل ،كذلك أنشغال الفتاه فى الدراسه قد يلهيها عن واجباتها اتجاه زوجها وبيتها ،، فيحدث الأنفصل من أول مشكله أو خلاف..؟؟
لا ماظن

:thnQ::bye:

[bad0o0ra]

ana brayey enna elderasa tyey gabel

ya3ny il bnt etha 3zaresat gabel ya betelha 3an il derasa aw 3an rayelha

both r not good

sa3aaat ykon il rayel metfahhem



bas mu3'6am il wakt mayetfahemoon

:n:



ilshahada '6roora al7een

[مخاوي الغربة]

ايماني مشكورة اختي على الموضوع الحلو

آنه من رايي ان الدراسة أضمن للبنت من ناحية مستقبلها على أساس انها اتخلص دراستها وهي في سن 23 -24 بالكثير

وبعدين تقدر اتكمل حياتها و تتزوج

بس ما في مانع انها تنخطب خلال فترة دراستها وتكمل الدراسة اذا كانت تقدر اتوفق بين الاثنين
ولازم خطيبها متفهم للموضوع بعد

:thnQ: ايماني

تحياتي
مخاوي الغربة :y:

[راعي المعاني]

السلام عليكم والرحمه

الصراحه موضوع مهم للبنات بشكل خاص ايماني , طبعا وانا مع راي الجماعه انه الدراسه مهمه للبنت بشكل ضروري مثل ما نعرف ان الزمن هالايام ما يرحم فشهادتها ضمان لها من الظروف ولو ان كان لزوم الزواج ومستعيله عليه فالخطوبه وهي تدرس وبعدها الزواج ,,

يعطيج ربي الف عافيه على الموضوع ايماني

تحياتي ل ايماني

[عـيـون الـمـهـا]

انا برايي انا الدراسة سلاح البنيه واذا البنيه ما عنده هاذي السلاح ماتسوى شي في المجتمع محد يعبرة لانه الشهادة ترفعه الى احسن مكان ومرتبة وشكرررررررررررا