سوالف دلبييروا للنقاش الراقي :: الحلقة الاولى ::

[DeL.Piero]

حكاية الموضوع:

هي احداث عشتها وحبيت
أنكم تشاركوني آرائكم فيها و سوالفنا راح تكون
بالعامية عشان تكون أجرب لكم " أتمنى :flowers: " ..
واددش القلب انشالله
و في كل حلقة أتمنى تعطوني آرائكم ..
ملاحظاتكم ..
نصائحكم أذا تبون تفيدون..

السالفة الأولى

"حسن التعامل و الرفق بالمساكين "


راح ابتدي سالفتي بقصة واقعية صارت قبل سنتين وانا كنت طالع من البيت تقريبا الساعة 9 الصبح رايح حق محاظرتي اللي بتكون الساعة 9:30
شغلت السيارة وخذيت كتبي وطلعت من البيت الا اجوف الهندي مال البلدية قاعد ينظف الشارع يم بيتنا وقعدت اطالعه واسأل نفسي هاي ماعنده أهل ؟ ماعنده زوجة وأعيال ؟ حتى لو مو متزوج شلون راضي بحياة مالها مستقبل مع انه حاله حالنا انسان وله طموح .
توني بطلع الا اجوف شخص للأسف بحريني قاعد يركض ياي من بعيد من الشارع الخلفي وطق الهندي وباق محفظته وشرد ( في البداية ما استوعبت اللي صار ) قلت في نفسي اكيد ذي ربعه يشتغلون وياه في البلدية يتغشمرون وياه .
بس لما جفت الهندي طايح وماقام الى عوقب فترة سيده عرفت ان الصبي اللي طق الهندي بايق ويوم قام الهندي مسكين قام يدور حواليه موب عارف الصبي اللي طقاه وين شرد اي صوب وانا قاع ااشر له اقول له شرد راح الشارع الوراني .
التفت الهندي ماشاف احد وقام يصيح :vip_b9eee ويصارخ وحط يده على راسه ( الصراحة صج كسر خاطري اهني ):(


رحت الحق البايق بس للأسف كانت سيارة ناطرته ركب السيارة وشرد وحتى مامداني ااخذ الرقم وقمت ادور في المنطقة قلت يمكن اصيدهم درت ودرت ودرت لين تعبت وتأخرت على المحاظرة قلت برجع للهندي وبعطيه دينارين على الاقل يسد يوعه ليوم او يومين ولما رجعت ماحصلت الهندي شكله راح يدور اللي طقه .
وطبعا تأخرت على محاظرتي وعوقب لما رديت البيت قلت السالفة حق بيتنا .
ماكانوا يقدرون يسون شي غير يقولون حسبنا الله ونعم الوكيل على الظالم
وهالسالفة رجعتني في الزمن وراا وقعدت اتذكر قبل يوم كنت صغير كان ابوي ساعات يوديني وياه الشغل كان يشتغل في شركة تتعامل مع بنوك وكانوا اللي وياه كلهم اجانب وكان كل واحد فيهم رافع خشمه للسما من الغرور حتى في كلامهم وفي تعاملهم حسيت انهم ينافقون يعني لما يبتسم حتى الابتسامة مو لله اكيد يبي شي.
المهم كان عندهم هندي يشتغل مراسل وكان ينظف لهم المكاتب وحتى سياييرهم حتى اشتروا له سيكل حق اييهم اسرع الصبح من مكان سكنه
( حتى كنت احسد ابوي على نظافة سيارته كل يوم :victory: )



عاد عوقب فترة (جمن سنة) ابوي وصل البيت وقام يسولف عن الهندي نفسه و فاجئنا بالخبر المحزن ان هالهندي مات . :(
ويوم سألنا شلون مات قال ماتصدقون لو قلت لكم!!!
قال لانه خله سيكله وراح يسوي شغلة ولما رجع لقى سيكله مبيوق :shock2:
:vip_b9eee ومن خوفه راح يراكض حق المركز يبي يشتكي وفي الطريج مات صادته سكتة قلبية وانتوا تدرون الواحد لين يركض اشكثر يدق قلبه (والله هالشي صار في الصج وللحين اتذكره )
:2:



انتهت سوالفي حق الحلقة الأولى واذا عجبكم بتابع وبحط سوالف ثانية
وموضوع النقاش هو :
(( ليش احنا قلوبنا قاسية مع المساكين هذيله يعني كلش كلش لما اتجوف هندي او فلبيني او اي عامل مسكين فقير حتى مانبتسم في ويهه مع ان اهما اكثريتهم طيبين , انا ما اقصد هالفئة فقط اقصد كل مسكين ليش ما نرتقي في تعاملنا مع المساكين))

[~ εммo ~]

اول شي ثنكس دل بيرو ومنور القسم ونبي الحلقات اليايه بعد:_67:


:_87: كسر خاطري الهندي اللى مات:_87:



بصراحه المفروض مانسئ معاملتهم لان اهم بعد بشر والدنيا دواره يمكن يجي يوم احنا نصير بمكانهم محد يدري شراح يصير المفروض الواحد قبل مايعاملهم بقسوه يحط في باله هل شي ويحط في باله انه مثل مااهو له اهل وبيت وعيال اهم بعد لهم اذا انقطع رزقهم البسيط من وين راح يعيشون ..

ودعوه المظلوم الله يسجيبها فاللي المفروض نسويه انه نعاملهم عادي لان حالهم من حالنه بس هذه حظهم في الدنيا انه يشتغلون هل اشغال البسيطه ..

[DeL.Piero]

اختي المشكلة

في ناس الله يعزج مسوين الهنود حمير شغل يكرفونهم كرف وفوق ذي يعاملونهم معاملة سيئة

صدقيني تره اهما مايهمهم اشكثر بيكون الشغل متعب على قد مايهمهم معاملة الشخص المستفيد له

يعني لو انا مثلا يبت هنود يعدلون حجرتي وكنت اتغشمر وياهم وحزة الغدة يبت لهم غدة

اتوقع انهم بيشتغلون بنفسية وايد اريح وهالشي بيفيدني مو بس بيطلع شغلهم مرتب بيفيدني حتى بعدين لما ابي منهم شغلة ثانية مابيقولون لي لا اذا يقدرون

[~ εммo ~]

اي دل بيرو وانت الصاج

الحمدلله في بيتنا اجوف لما عندنه عمال او هنود


امي تعاملهم من معامله اهل البيت


ياتخلي الخدامه تودي لهم عصير او كيك او اي شي عندنه


وامس اجوف عندنه هنود مادري شيسون الا ام تسألهم مسلمين كانت بتقول لهم اذا مومسلمين ويبون يشربون شي



المشكله يعني في الناس نفسهم وشلون اهم متربين يعاملون الناس ومايفرقون حتى لوو كان وزير او كان عامل بسيط

[DeL.Piero]

الله يخلي لج الوالد بطووو :_67:

وتعلمي منها .. ترى الام .. قلبها اطيب من الطيبة نفسها

[فرسان البحرين]

اي والله الغالي دل بيروو

في ناس وايد جذي الله يهديهم

يعني اخبرك عن واحد الله يهديه

عنده حوطه ورانا يايب له بنغالي

يكرفه كرف ازيد من كرف الحمير

يعني تخيل شغل الاسطبل ازيد

من اي شغل هو بنظف لرواقات

من عزكم الله الروث و يقلب الرمل

ويسبح و يخم الممرات ويعطيهم اكل

وينظف الغرفه ويعدل لسروج كل هاي

ودوامه من 8 الصبح يسوي هاي الاشياء

و يرتاح شوي و من الساعه 2 لين 5 المغرب

وهو من مشي لين شي يخليه يسوي

ولا كل هاي كله يكلمه من طرف خشمه

ولا تعال كم يعطيه نهايه الشهر يايبنه ع

اساس يعطيه كل شهر 70 دينار وكل شهر

يقوله انته ما نظفت زين انته خليت ذاك لحصن

ينجرح وانت جذي وانت جذي وما يعطيه الا

40 دينار يعني هاي مو حراام والله اشوفه ايي

للبنغالي اللي عندنا يصيح وهو يتكلم بس

من البدي لنغوج ماله تفهم انه فيه شي وسالت

البنغالي شفيه دوم يصيح يقولي عن سوات

ذاك فيه وشلون معاملته

لازم الواحد انته تبي منه شي لازم تعامله

معامله زينه ما امدح في نفسي بس دومي

ويا العمال مالناا مزاح وضحك وسوالف لان

حياة خيولي عنده اذا بعامله معامله مب زينه

ابسط شي ما بيسبح خيلي زين ولا بينظفهم

زين ولا ببيعطيهم اكل زين يعني بكون انه الخسران


والسموحه ع الاطاله الغالي

تحياتي للجميع

فرسان

[DeL.Piero]

:_67:

تسلم لي والله يبارك فيك

[فرسان البحرين]

الله يسلمك الغالي

يعني في اشياء

وايد في الحيا

هات وخذ

و ننتظر باقي سوالفك

ولا هنت

تحياتي لك

فرسان

[Emany]

مرحبـا ..

الله يرحمهـ مسكين,, وايد يكسرون خاطري ..

ووللأسف الشديد هاي حال مجتمعنا ..

لا وتقتصر هالمعامله القاسيه على الهنود بس ومادري ليش !

يعني اهما ياين ومتعنين لأنهم فقاره ويبون يحصلون لهم شي حق أهاليهم, ليش احنه نقوم ونأذيهم ! .. عالأقل يعاملونهم معامله طيبهـ ويعطونهم حقوقهم بس لأنهم في الغربهـ !


وتـرى مب بس الجاليات الآسيويه ,, حتى في ناس يعاملون البحرينين الفقراء معامله سيئه وجنهم عبيد عندهم ! اذا الله أكرمكم ورزقكم ,, اهما الله خلاهم فقرا وعلى قد حالهم !

يعني لو احنه نحط روحنه فـ مكانهم.. ممكن نتحمل هالمعامله الحقيرهـ ! أكيد لا ..

واللهـ يسكرون الخاطـر .. ومردها الأيام بتدور وبيينا واحد يعاملنه نفس ماكنا نعاملهم !

اشفيها اذا عطيتهم شي وانت ماتحتاجه ! ولا شوية أكل ! ..

الحمدلله ماقط مره عاملنا أحد بهالطريقهـ وماما ماترضى ! لـ درجه انها تعصب على اختي واخواني اذا قامو يعصبون ع الخدامه ..

موضوع راقـي يادلبيرو ,, ويعطيك العافيهـ يالشيخ .. :001:

احجز لي مقعد فالصفوف الأولى :_67:

[- Girl -]

اخوي مشكوووور على الموضوع الراقي

ولا تحرمنا من مواضيعك

ما تتصور شكثر عورني قلب على الهندي اللي باقوا منه البوك

اكره هالفئة من الناس بس تدري يعد يكسرون خاطري

انا برايي انه السبب الوحيد وراه هالمشكلة اهية نقص

اخوي مو بس على الفقارة والمساكين

انا في مدرسة خاصة والحمدالله كلهم عايشين في خير

لو تدري البوقات اللي تصير في المدرسة ما تقول هذيله ناس رايقين

والسبب النقص

يطلعون الحرة اللي تصيدهم من المشاكل من البيت او اي مكان في احد ضعيف

الله يلعنهم

وطبعا الله موجود واحس مهما كانت ديانه هالهندي حقه ما بيضيع

[نمولة]

والله للاسف يا خوي ان الناس الحين صارت تدوس على كرامة بعضها وتهين بدون احساس !!

ما ادري ليش بعض الناس ما يحسون بتصرفاتهم تجاه غيرهم ويستانسون اذا تعلوا وتكبروا على الفقارى المساكين

مثل ما احنا بشر ولنا مشاعر واحاسيس .. هم هذين الخدم والهنود اللي يايين يترزقون الله بشر ولهم مشاعر واحاسيس

واذا احنا ما نحب احد يهينا او يذلنا أو يجرح كرامتنا هم بعد ما يحبون هالشي

مهما كان هذولي بشر مثلنا .. لازم نراعي شعورهم واحساسهم

ومثل ما نحب ان يعاملونا معاملة حسنة لازم احنا نعاملهم معاملة حسنة ..

وانا ما الوم الخدم والهنود اللي يشردون اذا لاقوا لهم معاملة أقسى من الحياة اللي عايشينها .. كفاية انهم يذلون نفسهم علشان لقمة العيش،، محد بيتحمل هالمعاملة القاسية

بس شنسوي وشنقول .. الناس الحين انعدمت من قلبها الرحمة ،، وصاروا هالفئة ادنى مستوى من الحيوان - مع احترامي -

انا صراحة ,, ما احترم الناس اللي يتعلون على خلق الله ،، سواء من خدم أو هنود أو اي انسان فقير ضعيف

بالنسبة لي .. اعامل الخدم معاملة عادية مثل ما اعامل الناس الثانين ،، حتى اذا ادخل بيت واسلم على اهله واصافحهم لازم اسلم على الخدامة واصافحها لأنها بشر مثلنا .. وايد يستهزأون فيني لأني ساعات اقعد مع الخدم واسولف معاهم ،، أو لأني اصافحهم باليد
لكن ما يهمني اهم شي ما اسوي شي يجرح ضميري ويجرح الناس :)
شفيها يعني لو صافحتها ؟؟ عيب والله حرام !!

وفي النهاية ادعي الله ان يهدي هالفئة من الناس

- اللهم لاتجعلنا ممن يظلمون الناس واجعل قلوبنا رحيمة -


موضوع فعلا راقي ومفيد .. ننتظر الحلقات الياية ;)

[DeL.Piero]

Emany و Xx Girl xX ونمولة

يعطيكم ألف عافية في التفاعل معانا بهالموضوع وجزاكم الله الف خير

وانشالله تكونون قدوة للناس يارب :_67:

[بنت@@@القبايل]

موضوعك شدني
المشكله يادليبرو ان العرب وايد عندهم عزة نفس ورافعين خشومهم لسما و فيهم نعره :15:
بس ماعم في و في لا والله ابد معاملتم حسنه
وايد اشوف لهنود ينزفون و ينطقون



يعني مره كنت بالسياره و جدامنا هندي طالع من اللفه و كان له الحق في المرور
وطلع في وجهه ريال بحريني بسيارته يعني شبر و يدعمه:0031:
و شوي و نزل البحريني من السياره شلخ هالهندي الفقير المسكين و سدحه على السياره و طق فيه ولا لو تسمعوون الكف تقولون شحال وجهه هالهندي
من كثر ماطقه و يسمت في تي شيرته تشقق :aa_mo6req :aa_mo6req :aa_mo6req
الهندي عقب مامشه البحريني حب ياخذ ردت فعل خذ رقم السياره << الله يهداك ماتلحلت و طقيته خذت رقمه << ماعلينا
بس هل ذي كله يستاهل ان ينزل البحريني و يطقه ؟؟؟؟ :lac: :lac: :lac:



مثال ثاني
كنا في مجمع السيف في الفود كورت
و عامل النظافه يجي يم الطاولات و يشيل الصواني راح لمجموعة شباب بيشيل صوانيهم
اللي يجر بنطلونه و اللي خذ تلفونه واللي يكتت البيبسي على الارض
ليش شالنحاسه ذي !!!!!!!!!!!!!!!!!!!! :aa_bomb:
وياما و ياما
وآسفه على الاطاله
و تسلم على موضوعك الشيق

[الخداع]

من سوا .. سويله
اذا كانت لك القدرة في انك تذل شخص .. بجي يوم بتنذل فيه اذا هب في الدنيا
في الآخره

الأسلام والحمدالله أمرنا بأحترام الناس .. و أحترام الحيوانات أيضا ( وانتوا بكرامة )

و القوي الله ..

تحياتي

[كتكوتة البحرين]

اخوي دل بيرو ما تقصر على الموضوع و طرحك الحلو له ..

و صراحة الي انت تقوله صج و شي من واقع مجتمعنا .. الناس قامت تفكر انه هالاوادم المساكين عبيد عندهم و تعاملهم معامله سيئه و تنبذهم .. لكن ما نقدر نجمع الناس كلهم في ناس بالعكس .. قلبها حنون و عمرها ما تكبرت على اي احد .. و انا امي مثل بطه اذا عندنا عمال في البيت تحسب حسابهم معانا في الاكل و تعطيهم ريوق و عصير و ماي وانا وايد استانس و ساعات اذا نروح مطعم و يزيد اكل وايد ناخذه تيك اوي و نروح ندور لنا اي احد في الشارع و نعطيه اياه .. انا مابي اقول اشيه بعد لان الي اليد اليمين تعطيه لازم اليسار ما تدري عنه و كنت بس ابي اوضح .. و اشارك معاكم في هالنقاش الحلو ..

وانا بالنسبه لي الابتسامه في ويه اي انسان تفتح نفس المبتسم نفسه و تشرح له صدره انه ابتسم ..

و السموحه ع الاطاله ..

[virus]

والله انا احترم الهنود اكثر من بعض البحرينيين ..

حتى لين اجوف هنود في بيك اب قاعدين وره .. اقول هالمساكين مالهم احد يدافع عنهم .. اشلون يخلونهم هلون فالحر و تحت الشمس !!!!!

اكثر شي يبط جبدي لين واحد يايب عمال يشتغلون و حتى ماي ما يعطييهم
والله اهما بشر مساكين يايين علشان جم دينار يعيشون فيه و يعيشون اعيالهم بس الحثاله الي فالبحرين واايد عبالهم الهندي ولد حرام .. او حيوان يايبينه يشتغل

انا اذا مب مشغول او مستعيل ... عادي اوصل الهندي المكان الي يبيه ..

ناس يعاملونهم مثل ماكانوا اول يعاملون السود في تجاره الرقيق ... !!

الله عليهم